Golaha Amaanka UN-ka Oo Maanta Qaraar Ka Soo Saaraya Jeelashi Lagu Xiri Lahaa Burcadbadeedka Somalia
Thursday - March 10, 2011
New York - Waddamada Ruushka iyo Shiinaha, ayaa la sheegay inay diyaariyeen qaraar Golaha Ammaanka ee Qaramada Midoobay ku taageerayo jeelasha burcad-badeedda looga dhisayo maamulada Somaliland, Puntland iyo dalka Tansaaniya, kaas oo la filayo in la hordhigo kulan Golaha Ammaanku yeelan doono Khamiista maanta oo taariikhdu tahay 10 March 2011.
Sida lagu faafiyey shabakadda wararka caalamiga ah ee Bloomberg.net, qaraarka Ruushka iyo Shiinuhu diyaariyeen ee la hordhigayo Golaha Ammaanka, ayaa la doonayaa in wax lagaga qabto dhibaatooyinka burcad-badeedda Soomaalida iyo sidii dalalka Geeska Afrika looga difaaci lahaa in kooxaha argagisida ah ee xiriirka la leh ururka Al-qaacida.
Qaraarka dalka Ruushku diyaariyey, waxa uu xambaarsan yahay sidii Golaha Ammaanku si degdeg ah ugu guddo geli lahaa wadahadallo lagu abuurayo saddex maxkamadood oo lagu qaado kiisaska burcad-badeedda, loona dhisi laha laba Xabsi oo lagu hayo burcad-badeedda la xukumo, iyadoo dhinaca kalena qaraarkaasi xambaarsan yahay in dalalka adduunka oo dhan laga dalbado sidii loo samayn lahaa sharci dambiile u aqoonsanaaya burcad-badeedda.
Mr. Jack Lang oo ah la tilayaha Xoghayaha Guud ee Golaha Ammaanka, ayaa sheegay in ilaa 10 burcad-badeed ah oo gacanta lagu dhigay la sii daayey, kadib markii loo waayey awood sharci oo lagu xukumo, taas oo markii dambe dalbadeen in Somaliland, Puntland iyo Tanzania laga hirgeliyo maxkamad lagu xukumo burcadda badaha.
Xoghayaha Guud ee Golaha Ammaanka Qaramada midoobay Mr. Ban Ki Moon, ayaa qorshaynaaya maaanta qabsoomidda kulan ay ku lafa-gurayaanku sidii xal loogu heli lahaa ammaan-darrada, burcad-baddeeda iyo kooxaha xag-jirka ah ee Soomaliya ka jira sida Al-shabaab, waxa uu sidoo kale horkeeni doonaa qaraar ku wejahan horumarinta Soomaaliya.
Sidoo kale, dawladda Shiinaha, ayaa waxay soo diyaarisay qaraar iyo war-murtiyeed ku saabsan dhibaatooyinka dalka Soomaaliya, kaas oo ku sheegeen inay aamminsan yihiin inay ka dambeeyaan ammaan-darrada burcad-badeedda iyo kooxaha dablayda hubaysan ah ee ka jira dalka Soomaaliya.
Qarraarka Shiinaha oo la filayo inay horkeenaan kulanka Golaha Ammaanka ee Qaramada Mdiboobay u ballansan yihiin Khamiista maanta, ayaa waxay si adag ugu boorriyeen dawladda ku-meel-gaadhka ee Soomaaliya inay dhisaan dawlad dhinaca taban wax ka eegta, furan, isla markaana xor u ah inay dhammaan qaybaha bulshadu ka qaybgalaan siyaasadda, waxay sidoo kale ka codsadeen Qaramada Midoobay inay caawiyaan 8,000 ciidanka Afrikanka ah ee la dagaallamaya kooxaha xagjirka ah.
Dhanka kale, Xoghayaha Arrimaha Dibadda Marankanka Mr. Hillary Clinton, ayaa guddida sare ee Maraykanka u sheegta saddexdii bishan March in xukuumadda madaxweyne Barack Obama ay khaatiyaan ka taagan tahay burcad-badeedda, waxaanay tiri iyadoo ka hadlaysa arrintaa; Waxaynu u baahanahay inaynu fahano in dunida inteeda kale ay wanaagsan tahay inay ixtiraaman waxaynu qabano, isla markaana inala fahmaan xalinta dhibaatooyinka burcad-badeedda, maraykankuna waxa uu baratamaha kaga jiraa dib eegista siyaasadda Soomaliya.
Mrs. Clinton waxa ay ballanqaaday inay xal fiican ka gaari doonaan dhibaatooyinkan, iyada oo hoosta ka xarriiqday dilkii burcad-badeedu kula kacay 22-kii February afartii qof ee u dhashay dalka Maraykanka.
